Qəbul aparılan bəzi klinik bazaların tutumu və işləri haqqında ətraflı
Akademik Zərifə Əliyeva adına Milli Oftalmologiya Mərkəzi
Akademik Zərifə Əliyeva adına Milli Oftalmologiya Mərkəzi (bundan sonra – mərkəz) stasionar və ambulator müalicə üçün beynəlxalq standartlara cavab verən müasir diaqnostik və cərrahiyyə avadanlıqları ilə təchiz olunmuş maddi-texniki bazaya malikdir. Mərkəzdə oftalmologiyanın bütün sahələrini əhatə edən şöbələr və yüksək ixtisaslı mütəxəssislər fəaliyyət göstərirlər.
Fəaliyyət Göstərən Şöbələr
Mərkəzdə “Konsultativ poliklinika”, “Qlaukoma”, “Katarakta cərrahiyyəsi”, “Buynuz qişanın cərrahiyyəsi və transplantasiyası”, “Eksimer-lazer”, “Gözün yoluxucu xəstəlikləri”, “Uşaqlarda gözün patologiyası”, “Tor qişanın və görmə sinirinin patologiyası”, “Şəkərli diabetin göz fəsadları”, “Gözün vitreoretinal cərrahiyyəsi”, “Lazer cərrahiyyəsi”, “Gözün zədəsi”, “Okuloplastik və rekonstruktiv cərrahiyyə”, “Onko-oftalmoloji”, “Cərrahiyyə-əməliyyat bloku”, “Şüa diaqnostikası”, “Gözün tibbi ekspertizası” şöbələri fəaliyyət göstərir. Mərkəzdə stasionar və ambulator müalicə üçün nəzərdə tutulmuş oftalmoloji cihazlarla təmin olunmuş maddi-texniki baza mövcuddur.
Mərkəzin nəzdində həmçinin 2 səyyar klinika (avtomobil və dəmir yolu) mövcuddur. Fəaliyyət göstərən 78 elmi işçidən 52 nəfəri elmi dərəcəsi və elmi adı olan mütəxəssisdir.
Dövlət Gömrük Komitəsinin Tibbi Xidmət İdarəsinin Mərkəzi Hospitalı
Azərbaycan Respublikası Dövlət Gömrük Komitəsinin Tibbi Xidmət İdarəsinin Mərkəzi Hospitalı (bundan sonra – hospital) 25 dekabr 2008-ci il tarixində fəaliyyətə başlamışdır.
Hospitalda 74 stasionar çarpayı sayı ilə xəstələrə tibbi xidmət göstərilir, mürəkkəb əməliyyatlar (uroloji rekonstruktiv, canlı donordan və meyit donordan xəstəyə qaraciyər və böyrək transplantasiyası, travmatoloji əməliyyatlar, ağır xəstələrdə ürəkdə aortokoronar şuntlama və digər açıq ürək əməliyyatları, TAVİ, EVAR kimi invaziv müdaxilələr və digər əməliyyatlar) icra olunur.
Şöbələr və Xidmətlər
Hospitalın Ümumi Cərrahiyyə, Orqan Transplantasiyası, Anesteziologiya, Əməliyyatxana və Reanimasiya, Urologiya, Uşaq Cərrahiyyəsi, Travmatologiya və Ortopediya, Ürək-damar Cərrahiyyəsi, Kardiologiya, Efferent Terapiya, Mamalıq-ginekologiya, Radiologiya, Fizioterapiya, Neonatologiya və Pediatriya, Təcili Tibbi Yardım, Poliklinika və digər şöbələrində yüksəkixtisaslı tibb heyəti xidmət göstərir.
Poliklinika şöbəsində: Damar cərrahiyyəsi, üz-çənə cərrahiyyəsi, neyrocərrahiyyə, uroloji, nefroloji, travmatoloji və digər ambulator cərrahiyyə, stomatoloji, dermatoveneroloji, toksikoloji, endokrinoloji, qastroenteroloji, nevroloji, oftalmoloji, otorinolarinqoloji, pediatrik, psixiatrik və digər terapevtik tibbi xidmətlər göstərilir.
Laboratoriya və Diaqnostika
Hospitalın laboratoriyasında müasir, tam avtomatlaşdırılmış analizatorlar istifadə olunmaqla, biokimyəvi, PZR, koaqulopatoloji, hematoloji, bakterioloji, immunoseroloji və molekulyar-genetik müayinələr aparılır. Patomorfologiya şöbəsində isə histoloji, histokimyəvi, immunohistokimyəvi və immunofluoresens üsulları ilə dəqiq diaqnostik tədqiqatlar həyata keçirilir. Radiologiya şöbəsində 2 MRT cihazı, rəqəmsal rentgen, kompüter tomoqrafiyası, USM və digər qabaqcıl diaqnostik avadanlıqlar mövcuddur.
Elmi-Təcrübi, Tədris və Beynəlxalq Əlaqələr
Türkiyənin Florence Nightingale Hastaneler Qrupu və Demiroğlu Bilim Universiteti, Azərbaycan Tibb Universiteti, İ.M.Seçenov adına Birinci Moskva Dövlət Tibb Universitetinin Bakı filialı, Naxçıvan Dövlət Universiteti, Ə.Əliyev adına ADHTİ və digər qurumlarla imzalanmış memorandumlar çərçivəsində beynəlxalq konfranslar, təkmilləşdirmə kursları, müştərək elmi-tədqiqat və təcrübə proqramları həyata keçirilir. Böyük Britaniyanın Birmingem Qadın və Uşaq Hospitalı ilə əməkdaşlıq rezidentlərə xaricdə təcrübə keçmək imkanı yaradır.
Elmi-Təcrübi və Tədris Mərkəzinin təşkilatçılığı ilə 2019-2025-ci illər ərzində 219 tədbir həyata keçirilmişdir. Son 3 ildə 3 metodik vəsait hazırlanmış və təsdiq olunmuşdur (əlavə 1 vəsait təsdiq gözləyir).
Azərbaycan Elmi-Tədqiqat Travmatologiya və Ortopediya İnstitutu
Azərbaycan Elmi-Tədqiqat Travmatologiya və Ortopediya İnstitutuna 2011-ci ildən Travmatologiya və Ortopediya ixtisası üzrə rezident qəbulu həyata keçirilir. Bu dövr ərzində 200-dən çox rezident travmatoloq və ortoped ixtisasına yiyələnib.
Şöbələr və Kadr Potensialı
Klinik Şöbələr: Travmatologiya şöbəsi, Ortopediya şöbəsi, Əl Cərrahiyəsi və Yaralar şöbəsi, Uşaq Travmatologiya və Ortopediya şöbəsi, Artroplastika və Artroskopiya şöbəsi.
Kadrlar: İnstitutda 1 professor, 6 tibb elmləri doktoru, 5 dosent, 17 tibb üzrə fəlsəfə doktoru elmi dərəcəli həkim-mütəxəssis fəaliyyət göstərir.
Elmi-Tədqiqat Mamalıq və Ginekologiya İnstitutu
Azərbaycan Respublikası Səhiyyə Nazirliyi Elmi-Tədqiqat Mamalıq və Ginekologiya İnstitutu mütəxəssis kadr potensialı ilə xüsusi seçilir.
Kadr Potensialının Detalları
- Tibb elmləri doktoru: 5 nəfər (1 pediatriya, 4 mamalıq və ginekologiya)
- Professor: 1 nəfər (mamalıq və ginekologiya)
- Tibb üzrə fəlsəfə doktoru: 22 nəfər (3 pediatriya, 1 cərrahiyə, 1 andrologiya, 18 mamalıq və ginekologiya)
- Dosent: 9 nəfər (3 pediatriya, 6 mamalıq və ginekologiya)
Respublika Neyrocərrahiyyə Xəstəxanası
Respublika Neyrocərrahiyyə Xəstəxanasının klinik baza kimi fəaliyyəti yüksək standartlara cavab verir:
- Əməliyat otaqları müasir avadanlıqlarla təchiz olunmuşdur;
- MRT cihazı ilə təhciz edilmişdir;
- Tibbi və tədris məqsədli konfrans zalı mövcuddur;
- Mövcud çarpayı sayı 160-dır;
- Əməkdaşların rezidentlərlə iş təcrübəsi mövcuddur;
- Hazırda klinik bazada elmi dərəcəsi olan iki əməkdaş fəaliyyət göstərir.
Milli Hematologiya və Transfuziologiya Mərkəzi
Azərbaycan Respublikası Səhiyyə Nazirliyi Milli Hematologiya və Transfuziologiya Mərkəzi (bundan sonra – mərkəz) Hematologiya və Talassemiya bölmələrindən ibarətdir.
Hematologiya Bölməsi
- 10 çarpayıdan ibarət Reanimasiya və İntensiv Terapiya şöbəsi
- 35 çarpayıdan ibarət Onkohematologiya şöbəsi
- 23 çarpayıdan ibarət Pediatrik hematologiya şöbəsi
- 28 çarpayıdan ibarət Hematologiya şöbəsi
- Təcili tibbi yardım şöbəsi
- Bioinformatika və statistika şöbəsi
- Əczaçılıq xidmətləri şöbəsi
- Şüa diaqnostika şöbəsi (rentgen, KT, USM)
- Klinik diaqnostik laboratoriya şöbəsi: Hematologiya və hemostaz, Biokimya, Patohistologiya, Tibbi genetika, Talassemiyanın profilaktikası, İmmunologiya, Mikrobiologiya bölmələri.
- Terapevtik Xidmətlər şöbəsi: Konsultativ xidmətlər bölməsi, Pediatrik xidmətlər bölməsi.
Talassemiya Bölməsi
- Klinik diaqnostik laboratoriya bölməsi
- 30 çarpayıdan ibarət Pediatrik xidmətlər şöbəsi (Reanimasiya və intensiv terapiya bölməsi)
- Terapevtik xidmətlər şöbəsi
- Şüa diaqnostika bölməsi (rentgen, USM)
- 5 çarpayıdan ibarət Sümük iliyi transplantasiyası şöbəsi
- Təşkili metodiki bölmə
- Əczaçılıq bölməsi
- Transfuziologiya şöbəsi